چار سال بعد پاکستان ہائی رسک ممالک کی فہرست سےخارج، یورپی منڈیوں تک رسائی ممکن

اسلام آباد 29مارچ (ویب ڈیسک)یورپی یونین نے چار سال بعد پاکستان کو ہائی رسک ممالک کی فہرست سےخارج کر دیا ہے جس کے بعد پاکستانی تاجر اپنی مصنوعات یورپی منڈی تک برآمد کر سکیں گے۔
وزارت تجارت کی جانب سے بدھ کو جاری اعلامیے میں کہا گیا ہے کہ فہرست سے نکلنے کے بعد پاکستانیوں پر یورپ کے قانونی اور معاشی آپریٹر کی اضافی شرائط لاگو نہیں ہوں گے، اس سے ملک کو فائدہ پہنچے گا۔

اس سلسلے میں پاکستان کے وفاقی وزیر تجارت سید نوید قمر کا کہنا ہے کہ یورپی یونین نے پاکستان کو ہائی رسک ممالک کی فہرست سے نکال دیا ہے جو کہ پاکستانی اشیا یورپی یونین برآمد کرنے والے پاکستانی تاجروں کے لیے ایک اچھی خبر ہے۔

وفاقی وزیر نے بتایا کہ یورپی یونین نے پاکستان کو ہائی رسک تھرڈ کنٹریز کی فہرست سےنکال دیا ہے، پاکستان کو 2018 میں ہائی رسک ممالک کی فہرست میں شامل کیا گیا تھا، اس پابندی نے ہماری معیشت پر غیر ضروری بوجھ ڈالا تھا۔

انہوں نے مزید کہا کہ ہمیں یہ کامیابی وزیر خارجہ بلاول بھٹو زرداری کی انتھک کوششوں سے ملی ہے

یاد رہے کہ اکتوبر 2018 میں یورپی یونین کی جانب سے پاکستان کو ہائی رسک ممالک کی فہرست میں شامل کیا گیا تھا۔ ہائی رسک فہرست اینٹی منی لانڈرنگ کے خراب نظام اور دہشتگردی فنانسنگ کو روکنے کے لیے موثر انتظامات نہ ہونے کی نشاندہی کرتی ہے۔

اس فہرست کے جاری ہونے کے بعد یورپی یونین کے انسداد منی لانڈرنگ کے قوانین کے تحت کام کرنے والے بینکوں پر لازم تھا کہ وہ فہرست میں شامل ممالک سے لین دین قانونی اور معاشی آپریٹرز کے ذریعے کریں گے۔